الأعلام دي كانت قدامي في المسيرة، وفي كل مسيرة... بتهفهف وترفرف. طاهرة وبيضا ونقية زي قلوب الشهدا المرسومين عليها: أنس، الشيخ عماد عفت، مينا دانيال، علاء عبد الهادي..وغيرهم، ما احنا شهداءنا كتير!
حملة ألوية المسيرة، الجدعان اللي كانوا شايلينها، ايديهم تسلم! لما كانوا بيحركوها مع الهوا كان قلبي يتحرك معاها! ارواح الشهدا ساكناها ومستقرة فيها تبعث فينا الطمأنينة اثناء المسيرة؟ مجنونة أنا؟ لأ!
لما باشوف الأعلام في الأفق في امتداد المسيرة بالاقي نفسي بامد واجري عشان اقرب منها، كأن النداهة بتندهني، لحد ما الاقي نفسي جنبها، أستكين. ودموعي تنزل، ما اوريهاش لحد.الجموع، تهتف حواليا، أمد شوية، امسح دموعي، وأهتف معاهم بعلو صوتي !
مشيرة صالح
المعادي
في تمام الساعة الثانية عشر والنصف من صباح الخامس من ديسمبر
