شهادة صديقي أحمد حسني عن أحداث سيدي جابر يوم 28 يونيو

الاخوان النهاردة كانوا ٢٠٠ واحد معاهم كمية خرطوش و بنادق كتير جدا و لابسين خوذات بيضا و نضارات و بيضربوا في المتظاهرين الناحية التانية من المحطة

المتظاهرين كانوا مش ناويين علي شر بس لما الاخوان ضربوهم بالنار بعتوا يجيبوا سلاح من باكوس و ابو سليمان

الشرطة كانت واقفة بتتفرج بين الناحيتين و بتشعللها و مش بتعمل اي حاجة لحد ما لوا من الشرطة انضرب بالخرطوش من الاخوان و ابتدت الشرطة تضرب الاخوان بالخرطوش

المتظاهرين قبل ما يجيبوا السلاح خلوا الاخوان يجروا بالطوب بس و اهالي منطقة سموحة و سيدي جابر ابتدوا يجروا ورا الاخوان و يمسكوهم و خصوصا ان كان فيه اعتداء لفظي اكتر من مرة علي السكان و ضربوا واحد فيهم

فيه ناس اخوان اتمسكت و اللي انا حضرته واحد اتمسك بفرد خرطوش في شارع الا سي سي و السكان كانوا عايزين يقتلوه اكتر من ٢٠٠ واحد لولا ان انا و اخويا و هارون و كام واحد شلنا عنه الضرب لحد ما هرب في مدخل عمارة و الناس قفلت عليه لحد الشرطة ما جت اخدته

رجعت لقيت الاخوان بيولوا علي النت و بيقولوا بلطجية طلعوا علينا و ضربونا بالسلاح ... اللي باين ان الشباب بتوعهم نازلين و عامل حسابه علي الشهادة في سبيل الجماعة عشان الناس تخاف و متنزلش

حصل كام موقف في اليوم يخليني اقول ان الاخوان دول اقذر خلق الله و الواد الاخوان اللي انا حميت عنه ده (و هعمل كده تاني و تالت لو اتحطيت في نفس الموقف ) ندمت اني عملت معاه كده عشان هو انا عارف انه قتل ناس و لو قياداته امرته انه يقتل تاني هيقتل و هو مرتاح البال و الضمير و ضامن الجنة

بعمل حاجة و عارف اني هندم عليها

لحظات الترقب الأخيرة قبل 30 يونيو

في ناس شايفة #30_يونيو بطريقة مختلفة بعد الخطاب!لأنه معنى الخطاب ان #مرسي معاه #الجيش و #الشرطة و #الاخوان وده صحيح وانا مش مختلفة معاهم. لأني عارفة مسبقا ان #الجيش و #الشرطة مش معانا!وأظن ان الثورة الأولى في2011 وضحتلنا كده!الجيش عمره ما كان معانا والشرطة خصيمنا الأول واضح تماما ان هناك عدم وضوح رؤية لنزولنا #30_يونيو يعني عدة مجموعات لهم أهداف مختلفة!منهم من يريد استكمال الثورة ومن يريد رجوع الجيش ومنهم من يريد استمرار #مرسي وهم #الاخوان طبعا! مشكلتي مع #الجيش انه منتظر يرى اي كفة ترجح لكي ينضم لها وينفذ مخططه ويحمي مصالح. تجربتنا مع #المجلس_العسكري مريرة وللأسف الناس بتنسى ان كل ما نحن فيه نتيجة لسوء ادارة المجلس العسكري للبلاد ده من غير ما نضيف المجازر. #الداخلية ستستمر في أدائها المزري لأنها لن تغير عقيدتها لعدم تطبيق اي مشروع تم طرحه لإعادة هيكلتها أي ان هناك اصرار على بقائها كما هي. #الشرطة هي فتوة النظام!أي نظام شمولي هي النبوت اللي بيضربوا به اي صوت حر!هل عندنا استعداد نتعرض لنبابيتهم يوم #30_يونيو ولا حانجبن؟ الاجابة دي هي اللي حاتحدد شكل #30_يونيو وهي في ايدينا! الخوف اللي شاعرين به مبرر ومنطقي!وماحناش رايحين فسحة وتمشية عالبحر! دي حرية بتنتزع!

مصرتوبيا

لسه راجعة من معسكر مصرتوبيا! مصرتوبيا دي جزيرة عمر ما تم فيها انتخابات ديمقراطية ومافيهاش اي قوانين تحكمها! مجموعة من الأطفال من المنيا واسكندرية من مدارس أحد وجمعيات اسلامية لتحفيظ القرآن راحوا زاروها وصاغوا دستورها وناقشوه وتوافقوا عليه في سابقة لم تحدث في التاريخ في اي دولة! بعد كده رشحوا نفسهم في الانتخابات واتقسموا مجموعات: مرشحين، فرق ادارة الحملات الانتخابات، لجنة عليا للانتخابات، صحافة مرئية ومقروءة ومراقبين! وجربوا كل حاجة بتتم في االانتخابات بحلوها ومرها! حاولنا ننقلّهم الواقع بقدر الامكان مع حرصنا على انهم هما يحطوا تجربتهم الخاصة ويحددوا ملامحها وشكلها بدون ما نفرض عليهم اي حاجة.

عايزين المهم؟ ما تصدقوش أي حد يقولكم ان البلد دي (مصر مش مصرتوبيا) مافيش امل فيها وفي ولادها! ما تصدقوش أي حد يقولكم اصل ده شعب جاهل وهمجي وخسارة فيه الديمقراطية! ما تصدقوش اي حد يقولكم اصل مصر خلاص راحت في داهية ورايحة فين يا بلدي وحزين عليكي يا مصر والجو ده! اول ما تسمعوا حد بيقول كده، تعرفوا على طول انه ما بيخرجش من أوضته مش من بيته! شباب وقيادات المنيا المصريين الصبوات والجدعان اللي قابلتهم بلهجتهم المحببة المصرية الخالصة، وشباب اسكندرية وقياداتهم، كل الأطفال اللي شاركوا مبدعون وأذكياء، مصريون حتى النخاع. ابتكارهم وهما كلهم بيصيغوا الدستور وبيصيغوا قوانين اللجنة العليا للانتخابات وبيجرموا بشدة الرشاوي الانتخابية والخروج عن الآداب العامة والأعراف وكمان وهما بيغطوا الانتخابات وبيكشفوا اي انحرافات في الحملات وبيرصدوا اجراءات العملية الانتخابية أبهرني! حرصهم على ان يتم تجريم استخدام الشعارات الدينية وتوزيع الزيت والسكر على الناخبين (ده ولد من المنيا ومسلم اللي اقترح الكلام ده على فكرة). معيلتنا احنا وهما وقت السمر والترفيه ووقت لما رحنا البيسين وبلبطنا وفرحة ولاد المنيا بيه، واعتقادهم الخاطئ ان الاسكندرانية كل يوم بيعوموا في البحر زي السمك (مش عارفين الحقيقة المرة :) ) ولما قدموا مهرجان المواهب ولما رقصنا في الآخر على أنغام أغنية علشان لازم نكون مع بعض كانت حاجة توجع في القلب من كتر جمالها.  مش عايزة اكون باقول كليشيه، بس لو كل مصر تبقى زي مصر توبيا يبقى يا سلااااام... ممكن اموت وانا مستريحة!

نفسي اتكلم عن التجربة بتفاصيلها وعن كل واحد شارك فيها بس لسه واصلة وميتة من التعب بس حسيت ان الكلام متحوش جوايا ولازم اطلعه! ولاد الذينا فتحوا نفسي مش بس على اننا نكمل الثورة بس فتحوا نفسي على الحياة كلها! آخر مشهد مش حايفارق ذاكرتي واحنا الاسكندرانية بنودع المنياوية وهما خلاص راكبين الأوتوبيس وولاد المنيا طالعين من الشبابيك بيعيطوا ودموعهم نازلة مش عايزين يمشوا وولد اسمه امجد سنه حوالي عشر سنين، كان معايا في اللجنة العليا للانتخابات، وكنت بانطق اسمه زي ما هو بينطقه بتعطيش الجيم، مد ايده من شباك الأوتوبيس وانا شبّيت ورفعت ايدي عشان اعرف اسلم عليه وقالي بصوت عالي وبلهجته الصيعيدية الجميلة: يا كااابتن مشيييرة، انت ليكي فضل كبير جوي جوي عليا... انت غيرتيلي حيااااتي يا كابتن......مشهد حايفضل هو مشهد الخلفية لذاكرتي لفترة طويلة وحاتفضل عيني تدمع كل ما افتكره.... على فكرة: الأطفال المصريون عظماء.....
اشوفكم 30 يونيو

مشيرة صالح
الاسكندرية

اللهم اقبضني على ثورتك

انا بالفعل مستغربة جدا من رد فعل بعض النشطاء من اشتراك البعض يوم 30 يونيو ومش موافقة على الأسلوب ده! يعني ايه نهدد أي حد نازل يوم 30 يونيو مش مننا وما كانش معانا في الميدان؟! انا لا بانادي بالتحالف مع الفلول لأن هم سبب ما نحن فيه من عبث ولا مع لاحسي البيادات وعاشقي العسكر ومجاذيبهم لأني متذكرة جرائمهم ومذابحهم وهي كثر! لكن ما تبقاش نبرة الثوار التوعد وتهديد من سيتظاهر يومها من ناس بتنادي برجوع العسكر او من الفلول لأني متأكدة انها حاتعمل مشاكل وحاتؤثر على مسار اليوم وحاندخل في معارك جانبية قد تضر بالمتظاهرين بدون أن يتدخل الاخوان على الاطلاق! يا أصدقائي فرقتوا ايه عن الاخوان والجهاديين لما تهددوا بالعنف؟؟ ارحمونا والنبي ربنا يرضى عليكم!! ولازم نفهم جيدا الفرق بين اننا نتحالف سياسيا مع فلول او عاشقي عسكر وبين ان ناس تنزل تنضم للشارع يومها! لو كان كده كان من الأولى أن ترفضوا اشتراك الاخوان معكم يوم 25 يناير! حاجة أخيرة الشارع مش حكر على أي حد!!! لكن الثورة حكر بالتأكيد! في رأيي هو ده عيب الاخوان الأساسي انهم من وساختهم ممكن يضغطوا على احسن الناس فينا ويخرجوا اوحش ما فيهم!!! يا رب اقبضني على ثورتك وكما بدأناها نعيدها!

Morsi Power Cut Syndrome

المهم، اتعزمت على فرح ابن خال صديقتي رند ابو غنيمة في بلدها إربد في الأردن! المهم ما فيش نص ساعة بعد وصولنا الفرح وراح النور قاطع! أنا كمصرية أصيلة طبعا على طول حسست على البطحة وبحركة لا ارادية وتلقائية تماما قلت: "الله يخرب بيتك يا مرسي"! سألتني ليه؟ قلتلها ده طقس مصري اصيل بقالنا فترة بنمارسه! ولسه حالا جاية لي فكرةاني اسميه "متلازمة قطع النور او "مورسي سيندروم"! المهم ان الكهربا فضلت تروح وتيجي طول فترة وجودي في الفرح حوالي سبع او تمن مرات على مدار ساعتين! ومن هول الموقف قلتلها شفتي؟ كل ده وعازمة عدد واحد مواطن مصري! امال لو عزمتي الوفد المصري كله، كان حايحصل ايه؟؟!! باختصار نحن نختلف عن الآخرين! وبالمناسبة السعيدة دي احب اقول: الله يخرب بيتك يا مرسي، مواه 

ملحوظة: صديقتي العزيزة رند أضافت السطر ده: وبحب أضيف انه عمر النور ما قطع في فرح في تاريخ الأردن الحديث نورتي 
الفرح يا موشي 

بحبك يا مرسي