شجن

ينفع نروح الجنة؟ ينفع نختصر الوقت والمسافات ونروح هناك؟ هناك ... حيث ما لا عين رأت ولا أذن سمعت ولا خطر على بال بشر؟ طب ينفع أحس اني زي قطعة البازل؟ متركبة بالظبط في مكاني وزماني؟ أحس اني لايقة على المكان والمكان لايق عليا ومتعشقة في الزمان اللي باعيشه؟ ينفع ما احسش اني في فخ او موجودة في مكان وزمان لا أنتمي اليهما؟ ينفع ما احسش ان كل الأماكن والمشاهد والكلمات déjà vu ؟ وأنه لا طائل من الكتابة والقول؟

ينفع ما احسش ان البراح ضيق عليا؟ هل من المنطقي اني ما أحسش بالبراح؟ ينفع ما احسش بالحدود والعوائق والممكن واللا ممكن والمسموح والغير؟ هل الحد الأدنى من متطلبات الحياة الطبيعية أصبح بالنسبة لنا في تلك البقعة الملعونة من الأرض مستحيل؟

مشاهد القتل والعنف التي تبث على الهواء تؤرقني... دائما ما أقول لأصدقائي أننا نحتاج لعلاج نفسي جماعي يصلح ما أصابنا في العامين الماضيين... هل هذه كلفة السياسة أم الثورة؟ الألم فاق الاحتمال وما زلت أتألم انا وغيري، لكننا ما زلنا نحاول.. نرفع رءوسنا عن مستوى المياه لكيلا نغرق.. نحرك أجسادنا بأقصى ما نستطيع لكيلا نستسلم لتلك الدوامة التي تحاول أخذنا للقاع ... هل هذا ضعف؟ ربما! هل نحن بحاجة لاستراحة محارب! هل يسمح للمحارب بترك ساحة الحرب والانزواء بعيدا بعيدا؟ يترككم وصخبكم ومبالغاتكم وجنونكم لكي يجتر أحزانه ويلعق جروحه؟

رأيت فيما يرى النائم!

  رأيت فيما يرى النائم، خير اللهم اجعله خير، البوب (البرادعي يعني) كل القنوات بتشد السلخ عليه وتدعي انه قال اننا لازم نحضن بعض احنا والاخوان ومرسي وان مرسي لازم نعفو عنه، ولقيت كده خير اللهم اجعله خير، البرادعي وهو بينادي وبيقول بصوت جهوري (مجازا يعني) يااا مسروووور، تعالى عشان تجز رقبة مرسي الماثل أمامنا! 

 قام مرسي هارر على نفسه واعترف بكل حاجة من ايام ما شراشيح الحزب الوطني تعدوا على الناشطات والمراسلات في 2005 لحد محرقة بني سويف وقطر الصعيد والعبارة وخالد سعيد وكنيسة القديسين مرورا بموقعة الجمل وماسبيرو ومحمد محمود ومجلس الوزراء وصولا لمذبحة الألتراس وكل حاجة وانت ماشي بقى كده وجاي على 2013، ما الاخوان لازم يحاسبوا عالمشاريب كلها ولا ايه؟! 

 المهم، راح مسرور باصص لمرسي بنظرة مرعبة مفزعة خليته يعمل بيبي (مع الاعتذار للبيبي) على روحه، راح البوب قايل خلاص يا أبو الأمراس يا سكرة! عفونا عنك! ما هو انا اصلي واد حويط وضحكت على كل الناس وانا اللي حاطلع في آخر المسلسل وبدل ما تجيبوني من ضهري وانا منجعص عالكرسي حاتجيبوني من وشي ويتعمل عليا كلوز (بلغة أهل السيما) وأقول "أنا البرادعي يا روشدييييي هاهاهاها"! وانا اللي حاكون سبب دخول أمريكا العراق بالرغم من الفيديو اللي مغرق اليوتيوب يؤكد واللي طالع فيه بشحمي ولحمي وباتنيل واقول اني ما شفتش انا وزمايلي في البعثة اللي معايا ايتها سلاح نووي في العراق وان امريكا بتستعبطني وعايزة تعملني كوبري عشان تحتلها وانا عمري ما كنت ولا حاكون كوبري! هاهاهاهاها 

معلش ساعات كده الجلالة بتاخدني وباتخيل سيناريوهات غريبة! بس المهم يعني، مش انا جيت هنا وقلت من يومين، ما تصدقوش اي حاجة بتتقال على شبكات التواصل الاجتماعي وما ترددوش اي حاجة الا لما تتأكدوا؟ قلت ولا ما قلتش؟ وبعدين احنا مش متفقين ان الاعلام كله الا من رحم ربي زي MBC3 و Nickoledeon متسيطر عليهم سواء من الفلول على شاكلة CBC, ONTV, Nahar, etc... او من الاخوان Jazeerah وترسانة الاخوان الاليكترونية اللي بالفعل بتعمل شغل جامد واللي كادت تحول الدفة ليهم بعد 30 يونيو بالدايلما بتاعة انقلاب عسكري ولا ثورة ولا عيد ميلاد ولا ايه والاعلام الأجنبي وجب معاهم والشكر يرجع لوكالات العلاقات العامة في واشنطن وغيرها على مستوى العالم! سفلة دول! واضح طبعا ان التيار الثوري مالوش اي صوت ولا ظهير اعلامي يوصل صوته! ولازم نشوف حل في الموضوع ده خاصة في ضوء الحملة الاعلامية المنظمة والدعاية السلبية التي تمارس الآن ضد البرادعي، ومش عشان البوب! لأ عشانا احنا! احنا بقالنا تلات سنين بنلعب ديفينس ديفينس ويا ريتنا نافعين! اتهرينا اجوان! وما فيش اي ليبرو ولا فرود معانا يوزن العملية، واعلاميا وفي غياب ريم ماجد ويسري فودة، احنا ضااايعين!! وانا باتعجب ازاي البوب لسه صامد من ايام مبارك! الراجل ده بالفعل بركة وجبل انه مستحمل حتى الآن! أفتح قوس وأقول اني لسه كنت كاتبة عند صديق بيقول ان البرادعي الآن في مواجهة أبانا في اشارة منه للدولة العميقة، ان البرادعي احتمال كبير يرمي استقالته على وسع ايديه، او عشان أسطورة البرادعي القديس المناضل الذي لا يحيد عن الحق ولا يخاف فيه لومة لائم، يتم اغتياله (بعد الشر عليه طبعا) بس هي الشخصيات الاستثنائية دي كده! يجب ان تستمر في استثنائيتها ونبلها ومثاليتها بالشكل ده!! قفلت القوس! طبعا وارد جدا ان الحملات المنظمة ضده اعلاميا دي تجيب نتيجة! أبانا الذي مش حايهمد الا لما يجيب جون! حتى الآن بتطلع أوت بس لحد امتى؟ 

نيجي بقى لنمرة النهارده (واضح ان حايكون لنا كل يوم نمرة!! البرادعي عمل حوار في الواشنطن بوست، عايزاكم تقروه بنفسكم، وتمت ترجمته للعربية! الترجمة اتعمل بيها حفلة في كل حتة في مصر وفي زمن قياسي! خير؟ أؤمر! من امتى يعني الشعب المصري متابع قوي الصحافة العالمية وبيقرا الواشنطن بوست؟ انا مش باشكك والله بس هو انا أكره يعني؟ يا ريت ياخوانا نقرا الواشنطن بوست ونيويورك تايمز والجارديان والدير شبيجل، انشالله نقرا والمزاريطة كرونيكل يعني! بس لما كل القنوات تشتم فيه في نفس الوقت ووفي نفس ذات اللحظة الناس على تويتر وفيسبوك يشيروا بوستات تشتم فيه انه عايز مصالحة وأحضان وقبلات حارة مع الاخوان، وهما ولا قروها، ولا اتأكدوا من المعلومة، وفي الآخر يكتشفوا ان الموضوع في الكليتش وانه تم تضخيمه على الفاضي! مش انا لسه على ايدكم قايلة في المكان الطاهر ده كده تعليقا على مؤتمر ليدي اشتون؟ وان في تصريحات بتتقال عشان المحافل الدولية واللي منها؟ طيب عشان انا من مشجعي سيستم ادي الجمل وادي الجمّال

اليكم اللينكات المباركة. الواشنطن بوست

 http://linkis.com/washingtonpost.com/E62e 

جزء من الترجمة على صدى البلد، ولو اني محتاجة ترجمة أدق، ولو لقيت حاضيفها

 http://www.el-balad.com/573776#.UfxbCay1N_O 

والسلام ختام!