يوم مختلف

السبت 21 سبتمبر 2013 كان يوم مختلف! احتفالية سلمية بيوم السلام العالمي في محطة الرمل فاقت توقعاتي، تفاعل الناس معانا كان ممتاز، مجموعة يهمني الانسان شاركوا معانا وكانوا عارضين صور الشهداء من كل الأطياف منذ بداية الثورة وحتى رابعة أثر في الناس جدا ومش صحيح انهم نسوا الشهداء! كان في كورنر عشان الناس ترسم او تكتب فيه اي حاجة هما شايفينها تعبر عن السلمية، رجالة وستات وأطفال شاركوا معانا، اتكلمنا عن السلمية وعن اللي بيحصل في البلد. الفاشية الشعبية تجسدت أمامي في بعض المواطنين الشرفاء، سيدتان ورجل شافوا في ان صورة أسماء البلتاجي دي "قرف" ولازم تتشال، وبأننا اخوان عشان حاطين صورة من رابعة، واني انا شخصيا أكيد ماعنديش ضمير عشان انا اخوان وباخلق بلبلة واننا تعمدنا نعمل الفعالية يوم السبت قبل المدارس بيوم عشان نعمل مشاكل! الجميل ان الناس هي اللي دافعت عننا وقالولها ما هما حاطين صور ضباط وجنود سقطوا في رفح! المهم الموضوع عدى بسلام وفي ناس أبدت استعدادها انها تشتغل معانا وستات ورجالة شكرونا وأثنوا علينا عشان في نظرهم "كلنا مصريين".

بعدها كان في حلقة نقاش عن الدستور مع مجموعة من النشطاء حضرها الصديق العزيز عمرو صلاح عضو لجنة الخمسين. المناقشات كانت ثرية والحضور كان مستعد بمقترحات وصياغات محددة لمواد الدستور، بالبلدي الناس كانت جاية مذاكرة، مستوى ومحتوى الحوار كان استثنائي وايجابي جدا، ويمكن نقاش الأمس كان من المرات النادرة جدا اللي أحس فيها اني مش باحضر المكلمات والهري المعتادين. كل الحضور خاصة الأصدقاء الأعزاء Mohamad Fouad Rashad Abdelaal Faiza Sakr Karim Mahrous أثروا الحوار جدا، أما أستاذنا المحترم Mohib Aboud فصراحة أشعرني بمدى تقصيرعندما استمعت لدراسته وتحليله لكل مادة في الدستور وكان نفسي يمتد الوقت عشان نسمع منه أكتر! أما Amr Salah فكان كعادته عمرو صلاح! مجتهد، وواعي، مستمع ومحاور جيد، والأهم مخلص لقضيته جدا وبيؤكدلي انه بالفعل بيمثلني خير تمثيل داخل لجنة الدستور، بيبذل من جهده ووقته عشان يحقق هدف، كلنا بنسعى له من سنين. امبارح كان يوم من الأيام، اللي وقت الضلمة، بينور ويزقك لقدام ويحسسك ان اييه في أمل.... #آه_والله

مشيرة صالح