مشاهدات سريعة لأحداث مسيرة الاسكندرية يوم 8 فبراير 2013

مسيرة الاسكندرية بدأت بداية هايلة وانتهت بطريقة مؤسفة!الأمن اعتدى على المسيرة ومدير الأمن الكداب بيقول ان المتظاهرين اعتدى على القسم! الأمن كان منتظر عشان يعمل علينا كماشة ويضرب غاز وخرطوش بغض النظر عن الناس اللي في المسيرة!ستات كبار قطعوا قلبي ورجالة طيبين ما يستاهلوش كده! الشباب في ثانية طلعوا الكمامات والخل والميكوجيل وتعاملوا!الناس المواطنين اتلخموا واللي وقع على الأرض واللي انهار من الألم في العينين والكحة. اتعمل علينا كماشة يعني الأمن عند القسم وورانا وعلى شمالنا نادي سبورتنج ويميننا شوارع جانبية سد والغاز من كل ناحية!ما فيش مهرب! رد فعل المواطنين بطول المسيرة كان هايل سواء في امبروزو وهي منطقة شعبية تتبع الحضرة او داخل الحضرة عند الوكالة لحد الابراهيمية!

وقت ضرب الغاز رد فعل سكان منطقة سبورتنج هايل!كانوا معانا في المسيرة،بوابين العمارات كانوا معانا،في منهم كانوا عايزين يخبونا عندهم وست حارسة عمارة سلفتني طرحة عشان الف بيها وشي عشان الغاز وطلبت من ابنها يجيبلي كمامة من عندهم وكانت قلقانة علينا جدا ساعة ما تردد ان الأمن داخل الشوارع يقبض علينا. ساعة الضرب حاولت اثبت الناس عشان يفضلوا مكانهم بدل الجري والرعب،بس الأمن رمى غاز بغباوة بس الستات الكبار كانوا عظيمات!قالوا للناس مش حانمشي.  لكن هدف الأمن كان تفريق المسيرة لكيلا يصلوا لبيت المحافظ اللي مش عايش فيه اساسا بس هو كرمز مهم اننا نتظاهر عنده خاصة ان المحافظ الفعلي في الاسكندرية هو حسن البرنس الاخواني!اللي حصل النهارده معانا ما حصلش الا يوم 25 و28 يناير 12011!عنف مفرط غير متناسب مع الهجوم الذي يدعي الأمن انه حدث ضد قسم سيدي جابر!غير منطقي اطلاقا عندما تلقى طوبة على قسم وهو مبنى ومنشأة في نهاية الأمر يتم امطار المتظاهرين بغاز وخرطوش فوق الوصف!يعني من اول طوبة نلاقي الرد قنابل غاز وخرطوش اصاب كل المتظاهرين!بواب احد العمارات قالي ان فوق سطح القسم موجود ترسانة مجهزة مجهزة بغاز وخرطوش وكسر رخام وطوب وفي صور موثقة لكده بل فيديوهات لعناصر أمن بترمي علينا طوب من فوق سطح القسم!خلى معظمنا اللي بنؤمن بسلمية المظاهرات اننا نعذر من وقف وواجه الأمن بأدوات عنيفة مثل المولوتوف والطوب وخلافه!وماحدش يقول ايه اللي ودانا هناك!مسيرة سلمية وجهتها واضحة مشت حوالي 5ساعات لم تعتدي على أي منشأة او ضايقت أحدا من الأهالي! 

 الداخلية لن تستقيم طول ما عقيدتها اننا أعداؤها!ولسنا مواطنين من حقنا التظاهر السلمي وفنفس الوقت واضح ان الأمن خبرته معدومة في التعامل مع المظاهرات خاصة عند حدوث مناوشات!مش معقول تبقى اول خطوة في التعامل مع المتظاهرين هي الغاز والخرطوش!ارى ان هذه يجب ان تكون الحل الأخير الذي يلجأ له الأمن خاصة مع وجود سيدات واطفال!  ما لمسته اليوم هو أن الشارع مع المتظاهرين وضد الاخوان.  انا اتحدث هنا عن الطبقة التي تعشق الاستقرار مثل القهوجية الخضرية البوابين الخ... الناس قلوبهم كانت معنا متضامنين وبيدعوا على  الاخوان!مش قرفانين من المظاهرة بل بالعكس!يجب ان تستمر تلك الحالة الثورية في الشارع ونوصل  للناس في المناطق البعيدة والمهمشة!الناس دي عايزانا وزي ما هما اللي وقفوا جنبنا في 25 يناير وخلوا الثورة تنجح بخروج المظاهرات في الاسكندرية من المناطق الشعبية البعيدة عن ش ابو قير والترام والبحر وبورسعيد! اسكندرية اللي مش كورنيش!اسكندرية عند القطر!اسكندرية الحقيقية بتاعة الغلابة المسيرة عدت على محرم بك والغيط الصعيدي وامبروزو والحضرة!هي دي اسكندرية اللي لازم يفضل نضالها مستمر ضد تنظيم الاخوان الارهابي القطبي.  الاخوان اللي بالفعل سرقوا الثورة ودلوقتي بتعيد انتاج النظام السابق ببلطجة الداخلية وارهابها وقمعها،كأن الناس مثلا حايبقوا جبنا وحايخافوا من رصاصهم وغازهم وخرطوشهم!

من اللي شفته النهارده لما الاقي ست في سن أمي مصرة تفضل في المظاهرة بالرغم من كل ده،يبقى فعلا الثورة مستمرة

مشيرة صالح

السبت الساعة 1:33 صباحا، الاسكندرية

*انا هنا جمعت التغريدات اللي كتبتها على اليوم. باحاول اكتب بطريقة تفصيلية أكتر بس تعبانة جدا