أنا ولا همّا؟

يربوكي طول عمرك علشان تبقي بنت استثنائية غير تقليدية مستقلة ومختلفة عن كل البنات! ولما بالفعل تبتدي تمارسي حقك في السير في الطريق اللي لقيتي نفسك على أوله واللي انت اخترتيه بكامل حريتك، وتحاولي ان تثبتي "لهم" انك بتحاولي تبقي كما كانوا يتمنون، تلاقيهم بيمارسوا عليكي كل انواع الوصاية، ويفكروكي بكل العوائق اللي كانوا بيشيلوها من طريقك، ويرددوا على مسامعك كل المخاوف اللي هما حاسين بيها واللي هما على يقين ان المجتمع حايوصمك بيها! ومن هنا ييجي التناقض اللي الواحد يحس بيه، ويبتدي يراجع كل قناعاته اللي بناها على مدار سنين! وتلاقي نفسك بتسأليها سءال: مش كان أسهل انهم يربوكي عشان تبقي بنوتة لطيفة عادية وجميلة كل همها في الدنيا انها تتجوز وتجيب عيال وفقط! كان ايه بقى لازمة التحدي والقراءة وملو الدماغ بكلام كبير وكتير والاقتناع بأنك ليكي دور تاني في الدنيا لازم تقومي بيه وانك مش لازم تحصري نفسك في دور الأنثى! انت انسان ليكي مخ ولازم تبقي حاجة مهمة وكبيرة! هزة ممكن تخليكي تغيري كل حاجة، بس هو الوقت متأخر ولازم تكملي! حاتستمري؟ صح؟

مشيرة صالح